Киришүү. Дүйнө жүзү XX кылымдын башында

Соңку тарыхтын 9-класс темасы: «Киришүү. Дүйнө жүзү XX кылымдын башында» (5–12-беттер, Т. Өмүрзакова). XX к. башында АКШ менен Европанын алдыңкы өлкөлөрүндө экинчи технологиялык революция кулач жайган; машина куруу, электротехникалык жана нефть-химиялык өнөржай күрдөөлдүү өнүккөн. Генератор, телефон, электр жарыгы, рентген нуру XIX к. эле ойлоп табылса да, массалык колдонуу XX к. башында башталган. 1914-жылы АКШнын айыл чарбасында 17 миң трактор пайдаланылган. Автомобиль чыгаруу боюнча биринчи конвейерди Генри Форд 1914-жылы ишке киргизген. Шаарлар тездик менен өскөн: 1880-ж. Европада калкы 1,5 млндон ашкан 8 шаар болсо, 1914-ж. алардын саны 29га жеткен. Колониялардын аянты 50 млн чарчы км, калкы 500 млн адам болгон. Батыштын кийлигишүүсүнөн бир гана Япония сыртта калган. 1913-жылы Швецияда бүткүл калкты пенсия менен камсыздоо киргизилген.