§1. Диндердин негиздери жөнүндө түшүнүк

«Диндердин өнүгүү тарыхы» сабагынын 9-класс темасы: «§1. Диндердин негиздери жөнүндө түшүнүк» (8–14-беттер, А. К. Доталиев ж.б.). Диндердин негиздери төрткө бөлүнөт: диндин булагы, ишеним, ибадат жана адеп-ахлак. Диндин булагы – Жаратуучу, Ыйык китеп, анын элчиси, элчисинин сөздөрү жана үлгүлүү кыймыл-аракеттери. Ишеним – диндин булагы аркылуу белгиленген нерселерге ишенүү. Ибадат – диний баалуулуктарды аткаруу. Адеп-ахлак – диний баалуулуктарды инсандын ички дүйнөсүнө сиңирүү. Бир диндин негиздерин билдирген китеп «Ыйык Китеп» деп айтылат; алар негизинен Тоорат, Забур, Инжил жана Куран деп айтылып келет. Буддизмдин ыйык тексттери пали тилинде жазылган Трипитака (Үч Себет) деп аталып, үч бөлүмдөн турат: Виная-Питака, Сутта-Питака жана Абхидхама-Питака. Христиандардын ыйык китеби эки бөлүмдөн турат: «Эски Осуят» жана «Жаңы Осуят». Ислам дининде – Куран, андан кийин пайгамбардын кыймыл-аракети (сүннөт), аалымдардын бирдиктүү пикири (ижма) жана салыштырмалуулук эрежеси (кыяс) турат.