Киришүү. Орто кылымдар тарыхы

«Тарых» сабагынын 7-класс темасы: «Киришүү. Орто кылымдар тарыхы» (5–8-беттер, Ш. К. Керимова). Орто кылымдар тарыхы — бүткүл дүйнөлүк тарыхтын, бүткүл дүйнөдөгү элдердин тарыхынын бир бөлүгү. Орто кылымдарда элдердин көбүндө кул ээлөөчүлүк эмес, феодалдык түзүлүш болгон: бул түзүлүштө негизги бири-бирине кас таптар феодалдар жана көз каранды дыйкандар болушкан. «Орто кылым» түшүнүгү илимге XV–XVI кылымдарда италиялык гуманист-тарыхчылар тарабынан киргизилип, XVIII кылымда калыптанган. Орто кылымдын тарыхынын чеги кул ээлөөчүлүк Рим империясынын кулашы (476-жыл), ал эми орто кылым тарыхы менен жаңы тарыхтын чеги XVII кылымдагы Англиялык буржуазиялык революция деп эсептелет. Орто кылымдардын тарыхы 3 мезгилге бөлүнөт: алгачкы феодалдык мезгил (476-жылдан XI кылымга чейин), өнүккөн феодалдык мезгил (XII–XV кылымдар) жана соңку феодалдык мезгил (XVI–XVII кылымдын 1-жарымына чейин). Окумуштуулар орто кылымдардын тарыхын буюм эстеликтери, архивдердеги жазма документтер, хроникалар жана искусство чыгармалары боюнча изилдешет. XV кылымдын орто ченинде китеп басуу ойлонуп табылганга чейин бардык документтер кол жазма түрүндө болгон.