Музыкадагы образ жана композитордук музыка

«Музыка» сабагынын 6-класс темасы: «I чейрек. Музыкадагы образ» (4–11-беттер, А. М. Муратова, К. Ж. Артыков). Музыкалык образ музыкалык чыгарманын мазмуну, башкача айтканда көркөм образ аркылуу берилет. Музыкалык образдар лирикалык, драмалык, эпикалык, баатырдык жана турмуштук образдардан турат: мисалы, «Манас» операсында Манастын образы баатырдык, ал эми «Айчүрөк» операсында Айчүрөктүн образы лирикалык образ болуп эсептелет. Композитор (түзүүчү, чыгаруучу) — музыка чыгарган адам, автор; бул термин Италияда XVI кылымда тараган. Элдик музыканын автору жазылган эмес, ал оозго-ооздон өтүп сакталып келген, ал эми композитордук музыканын автору белгилүү. Композиция (түзүү, ойлоп табуу) — музыкалык чыгарманын курулушу. Абдылас Малдыбаев (1906–1978) — кыргыз элинин туңгуч композитору, СССРдин эл артисти; В. А. Власов, В. Г. Фере менен бирге «Айчүрөк», «Манас» операларын жана Кыргыз ССР гимнинин музыкасын жазган. Калый Молдобасанов (1929–2006) — залкар дирижёр, «Саманчынын жолу» балет-ораториясынын автору. Балет (франц. ballet, итал. balletto — бийлейм) — музыкалык искусствонун бир түрү. Бүбүсара Бейшеналиева (1926–1973) — кыргыз балетинин баштоочусу; Чолпонбек Базарбаев (1949–2002) — СССРдин эл артисти, атактуу бийчи.