§1. Компьютердин негизги бөлүктөрү жана функциялары

«Информатика» сабагынын 6-класс темасы: «§1. Компьютердин негизги бөлүктөрү жана алардын функциялары» (4–12-беттер, Т. Р. Орускулов, М. У. Касымалиев, А. А. Кузнецов, Л. Л. Босова). Заманбап компьютер – бул информация менен иштөөчү универсалдуу программалык башкарылуучу электрондук түзүлүш. Ал процессордон, эстен, информацияны киргизүүчү жана чыгаруучу түзүлүштөрдөн турат. Процессордун негизги мүнөздөмөсү – такт жыштыгы жана разряддуулугу. Компьютердин эси ички жана сырткы болуп бөлүнөт: ички эске оперативдүү эске сактоочу түзүлүш (ОЭСТ) жана туруктуу эске сактоочу түзүлүш (ТЭСТ) кирет. Компьютер өчкөндө оперативдүү эстеги информация жоголот, ал эми сырткы эстеги информация сакталып тура берет. Киргизүүчү түзүлүштөр – клавиатура, маус, микрофон; чыгаруучу түзүлүштөр – монитор, принтер, колонкалар. Стандарттык клавиатурада 104 клавиш болот. Системдик блок, клавиатура, маус жана монитор компьютердин иштөөсүн камсыз кылуучу минималдуу комплектти түзөт.