§1. Адам жана инсан жөнүндө түшүнүк

«Мамлекет жана укук» сабагынын 9-класс темасы: «§1. Адам жана инсан жөнүндө түшүнүк» (5–9-беттер, Ө. Б. Саалаев). Адам – бул жаратылыштын эң жогорку продуктусу. Ал көптөгөн биологиялык керектөөлөргө ээ: дем алат, тамактанат, уктайт. Ошол эле учурда адам – коомдук жандык: ар бир баланын ойлонгонго мээси, үн чыгаруучу органдары бар, бирок ал коомчулукта гана ойлонгонго жана сүйлөгөнгө үйрөнө алат. Адам жаныбарлардан эмгек куралын жасаганга жана колдонгонго жөндөмдүүлүгү, эң татаал түзүлүштөгү мээге ээ болушу жана чыгармачылык менен эмгектенүүгө жөндөмдүүлүгү менен айырмаланат. Жер жүзүндө бири-бирине коёндой окшош эки адамды таба албайбыз – ар бир адам кайталангыс, уникалдуу. Инсан – бул өзүнүн социалдык ролдорун аткарууга толугу менен даяр индивид. Индивидуум – ар бири өз алдынча өмүр сүргөн, жекече жан; индивидуалдуулук – жекече жандын кайталангыс өзгөчөлүктөрү. Инсан бойдон эч ким төрөлбөйт, инсан болуп калыптанат.